الخميس، 28 أغسطس 2008

حوار عادى فى زمن اختفت فيه الاخلاق

مى في سن المراهقة (16سنوات) تجلس مع جدتها (70 سنة) ويدور بينهما هذا الحوار:


مى: تيته ميرو إزيك..بقى لي زمان ما قعدتش معاكي


الجدة: وهو أنا عارفة أتلم عليكي خالص.. ده أنا قاعدة زهقانة قوي ومش لاقية
حاجة تسليني

مى: ومابتفتحيش الدش ليه يا تيته


الجدة
: التليفزيون بقى ممل خالص مافيهوش غير 9700 محطة بس!.وأنا كمان ما بعرفش أغير المحطات!

مى: وإيه الحلاوة دي؟ حلو البدي اللي انتي لابساه ده..بس ده
موضة قديمة قوي ياتيته !

الجدة : يا بنتي أنا ست دقة قديمة وبالبس زي ما
جيلنا الصاعد اتعود وحسب التقاليد القديمة بتاعتنا

مى : أيوه بس مش
حاسة إنك مخنوقة وانتي لابساه؟

الجدة: أبداً ده هو ده اللبس المحتشم اللي
مفروض الكل يلبسه ويحافظ عليه..فين أيام زمان لما كنا نلبس البدي اللي مبين البطن والظهر بس، مع البنطلون السترتش الجلد …كانت حاجة آخر روشنة

مى : ياه
يا تيته.. ده انتوا كان ليكم تقاليد غريبة خالص !

الجدة: أمال انتي فاكرة
إيه .. وبعدين كانت الست من دول ما تلبسش اللبس الخليع بتاع اليومين دول..يعني الجيبة كان ما يقلش طولها عن شبر وربع .. وكانوا الستات يلبسوا فوقيها بلوزة باستمرار ..مش زي دلوقتي! حسبي الله ونعم الوكيل!

مى : يا خبر .. وإيه
كمان ياتيته

الجدة: ح أقول لك إيه ولا إيه يعني خدي عندك مثلاً .. زمان كنا
نسمع الطرب الأصيل لمطربين حقيقيين زي مصطفى قمر وعمرو دياب وطبعاً كانت سيدة الغناء "شاكيرا"، وكانت الأغنية مدتها أكثر من دقيقتين متواصلين من الطرب الأصيل والموسيقى الهادية الراسية اللي تعمر النافوخ بصحيح كانوا مطربين روشين وآخر طحن، حسبي الله ونعم الوكيل!

مى: وبعدين ياتيته


الجدة : وبعدين
كنا نسمع على حاجة اسمها اسطوانات ليزر، ودي صحيح انقرضت، بس كان ليها طعم عن دلوقتي، يا سلام لما كنا نحطها في الووكمان ونعلقها في حزام البنطلون كده ونمشي في الشارع كده، كانت أيام جميلة. حسبي الله ونعم الوكيل!

مى: حكاويكى
ممتعة قوي يا تيته .. ثانية واحدة بس لما أصحي مصطفى صاحبي فى المدرسة لأنه بايت معايا في الغرفة من امبارح ..أصل الإنسان الآلي بتاع الصحيان بايظ ولازم نصلحه النهاردة

الجدة: طيب ياحبيبتي روحي


(
بعد عدة دقائق
)

مى: هاااا يا تيته.. وبعدين


الجدة : أحلى أيام بقى كانت أيام
الدراسة، الفصل كان على أيامنا رايق وعدد التلاميذ فيه ما يزيدش عن ستين سبعين تلميذة، وكنا ساعتها بنعرف نفهم الدرس كويس مش زي دلوقتي، وكانت الشوارع أيامها فاضية يعني كانت إشارة المرور تقعد ساعة إلا ربع بس لأن مصر كلها كان تعدادها 70 مليون مش أكثر، تخيلي بقى الروقان اللي كنا فيه؟ حسبي الله ونعم الوكيل!

مى : 70 مليون بس؟
!!

الجدة : أمال إيه .. عشان كده كانت كل
حاجة رخيصة ، يعني مثلاً كيلو اللحمة يوم ما يضربه الدم كان يبقى بخمسة وتلاتين جنيه أو اربعين جنيه، وكان أتخن جوز جزمة بـ 250 جنيه، وكان الواحد يقدر يشتري شقة تمليك بـ 150 ألف جنيه بس..وكان اليورو بسبعة جنيه و نص بس تخيلي بقى؟

مى : ما هو علشان كده الجواز على أيامكم كان سهل خالص، إحنا بقى خلصنا
من العُقد دي

الجدة : يا بنتي إحنا اتربينا على الأخلاق والفضيلة والعادات
والتقاليد . يعنى كان أهل الفن محتشمين جداً وكانوا دايماً يطلعوا بالمايوهات والمذيعات كانوا يقعدوا جنب الضيف مش زي دلوقتي.. هيـ يـ يـ يـ ـه الله يرحم دي أيام.. فكرتيني بالذي مضى حسبي الله ونعم الوكيل!
تمسك الجدة بتليفون محمول في
حجم علبة الكبريت)

مى : ح تكلمي مين يا تيته


الجدة : الحقيقة
أنا كنت موصية الجزار على اتنين كيلو لحمة و اديته 600 دولار عربون وعايزة أطلبه أشوف إذا كانت اللحمة وصلت ولا لأ ..

مى: (تنهض من مكانها) تشاو سي يو
تيته!

الجدة: سي يو


وبعد مرور عدة ساعات انتابت الجدة خلالها
غيبوبة بسبب الشيخوخة

و في المساء دار هذا الحوار بين الجدة والحفيدة
:

الجدة: إنتي كنتي فين يا مى؟


مى :أصل إحنا أخدنا الولد من
الحضانة ..

الجدة : ولد !! ولد إيه اللي أخدتوه من الحضانة؟


مى : آه صحيح أنا نسيت أقول لك .. أصل أنا جبت ولد من مصطفى صاحبي


الجدة: يا بنتي مستعجلين على إيه مش لما تتجوزوا ؟ حسبي الله ونعم الوكيل
!

مى : يا سلام عليكي يا تيته.. إنتي عليك تحكيمات غريبة..طيب إيه اللي
يمنع نخلف من غير جواز أنا شخصياً عملتها ونفعت

الجدة : مشكلتي إني ما
باعرفش أزعل منك يا فتفت يا عكروتة ..وسميتوا المحروس إيه بقى

مى
: سميناه (دوت كوم) ..

الجدة : نعم . دوت كوم؟ نظام هاي تك بقى؟ يعني لما
تعوزي تنادي له تدوسي (إنتر) ولا إيه بالضبط ؟

مى : ها ها ها ها
.. إيه الخفة دي يا تيته .. والله فكرة .. لما أعوز أنده له أدوس إنتر .. ولما أحب أقول له روح أودتك أدوس
(
ألت و إف4
)

أفتح لك التليفزيون يا تيته عشان
تشوفي نشرة الأخبار

مى تضغط الريموت كنترول لنرى شاشة كبيرة بطول وعرض
حائط الغرفة، وتظهر صوت مذيعة مصحوبا بلقطات للأنباء تقول:

المذيعة : هاي
شلة! إليكم عناوين أخبار الفن

-
زفاف المطربة صباح على حفيد الفنان الراحل
راغب علامة

-
الفنان حازم احمد محمد هنيدي يهاجم نجوم الكوميديا الجدد


المذيعة: فينيش باي
.




حوار بين حفيدة وجدتها عام 2080

هناك 21 تعليقًا:

عبــــــــــث يقول...

السماء الدامية ...

رائع ما كتبت

قيم ما خطه قلمك

" بس بجد آخر روشنه "

ههههههههههه

الله يستر من القادم

اللهم أدم لنا أخلاقنا وأعنا على كل خير

" بس يا ترى أنا رح أكون تيته روشه متل هي هههههههه "

اللهم عافينا يا رب

تحيتي لك

تقبل مروري

عبث

blue-wave يقول...

هههههههههههههههههههههههه
والله تحفه
بوست خفيف وجه فى وقته والله
تحياتى

نـــــور يقول...

ههههههههههههههههه
والله برافو عليك ياقمر
بجد دمك عسل وكلامك ف الجون ساخر ساخر ساخر

بس بيتهيالى مش لازم 2080

انا بيتهيأل هنوصل كده فى 2030
عادى يعنى

بس بجد
برافو
كل سنه وانت طيب ورمضان كريم

شهد الكلمات يقول...

هههههههههههه

اكتر حاجة ضحكتني جواز الفنانة صباح هههههههه

لا جامدة

انا لسة شايفة كليب ع الفيس بوك جابلي اكتئاب عن حلاوة و طعامة و حشامة بنات الجيل المحترامات

حسبي الله و نعم الوكيل
و ربنا يلطف بينا

تحياتي

السماء الداميه يقول...

عبــــــــــــــــــــــــث

طبعا انا سعيد بمرورك وزيارتك وخاصة انك

انتى التعليق الاول وده شئ يفرحنى ويخلينى

منشكح وان شاء الله ربنا يعنا على الخير

وتبقى تيتة روشة كدة زيها على العموم

شكرا على الكلام الجامد ده

السماء الداميه يقول...

blue wave

شكرا على التعليق الخفيف ده ههههههههههه


بس نفسى اعرف ليه جه فى وقتهممكن ولا دى خصوصيات

السماء الداميه يقول...

habiba



شكرا والله انتى القمر بس 2030مش هيكون

الفرق كبير لكن كل مدى كل ما الفجوة تمتد

وتتسع حتى سوف نغرق فيهاوعموما انا

لسة

مستنى منك التاج وسعيد بتعليقك وزيارتك

السماء الداميه يقول...

شهــــــــــــــــــد الكلمات

شكرا يا شهد على التعليق الهادف ده بجد

انتى بتقولى كلام قليل بس مفيد ومتبعة

طريقة خير الكلام ما قل ودل وهذا يمكن سمة

فيكى عجبانى شخصيا ونفسى امتلكها لكن الله

هو الوهاب الرزاق وعموما نا عارف انى

دخلت فى موضوع تانى اعذرينى انا بجد سعيد

بالكلام الجميل ده


شكررررررررررررررااااااااااا

شهرزاد يقول...

السماء الدامية
بوست رائع جدا ودمه خفيف جدا
هل ستصدق تنبؤاتك يا ترى؟
وإن صدقت فنحن من سيء إلى أسوأ..
وربنا يعيننا على ما هو قادم
وتفتكر صباح هتعيش ل 2080
ممكن ولله في خلقه شؤون

دمت بود
تحياتي لك

السماء الداميه يقول...

شهرزاد


شكرا على الكلام الجميل والله فى حالنا دلوقتى لازم الواحد هيتنبا بكدة فى ظل ظروف الحياة هذه على العموم والله شرفتينا

وبخصوص صباح انا وضعت هذه الفقرة للفكاهة

محمد فاروق الشاذلى يقول...

السماء الدامية
إيه يا عم ده، لأ إن شاء الله مصر مش هاتكون كده، إن شاء الله هاتبقى أفضل وأحسن.

بس البوست لذيذ جداً

السماء الداميه يقول...

قلب مصرى


للاسف انا بختلف معاك انا نفسى مصر تكون احسن بس متوقعش فى ظل هذه الظروف المريرة

فراشة البساتين يقول...

احلى حاجة بقى عجبتنى

ان تيته كل شوية تقول ( حسبى الله ونعم الوكيل ) آه والله

حسبى الله ونعم الوكيل

ولا المذيعة اللى طالعة تقول (هاى شلة)

تصدق توقعات فى الجون

ودائما يا مصر الى الامام

ربنا يلطف بينا

محمد فاروق الشاذلى يقول...

كل رمضان وحضرتك بخير
اللهم بلغنا ليلة القدر واجعلنا من عتقاء هذا الشهر

السماء الداميه يقول...

fire bird

شكرا على التعليق الجميل والله انا متوقع ده وكويس انك نفس توقعاتى

السماء الداميه يقول...

قلب مصرى


كل عام وانت ورقية بخير واهلك الكرام فى احسن حال

Radwa يقول...


بجد بوست حلو اوى
انا بجد موت من الضحك
................
سندريلا

فارس بلا جواد يقول...

كل سنة وانت طيب .. ورمضان كريم
البوست جميل بالتأكيد
بس ليا نصيحة صغيرة يا ريت ما تزعلش منها .. التدوين فرصة أننا نطلع اللي جوانا ونكتب من دماغنا سواء عجب الناس او لم يعجبهم
منتظر منك الجديد
تحياتي

السماء الداميه يقول...

sendrlla

شكرا على التعليق الجميل وعلى كلامك السكر ده

السماء الداميه يقول...

فارس بلا جواد


ايوة انا عارف ان التدوين طبعا كدة وبجد اى نصيحة منك متبقاش زعلة بس انا مش فاهم حاجة

فراشة البساتين يقول...

على فكرة

ليك هدية عندى

ياريت تيجى تاخدها

بس بسرعة

رمضان كريم